أراجوز لـ محمد فهيم من كتبي

الكَلِمَة
بَعِيش بِيهَا لِمِليُون عَام
وِتِخْفِينِي.. كَمَا الأَوهَام
سَاعَات بِيهَا أَكُون سَاحِر
سَاعَات مَا أَقدَرشِي أَخَطِّي أَمَام
وبِيهَا بكون عَالَم تَالِت
وِأَكُون بيها ابن عَمَّك سَام
وِبَقْتِل بيهَا مِيت معنى!!
ولا مَرَّة بَاخُد إِعدَام
وأَطِير بِيهَا بِدُون جِنَاحِيِن
وِأَسبَق أَي فَرْد حَمَام
وِازحَف بيها فُوق عُمْرِي
وِابدَأ وِانهِي فِي الأَيَّام!!
أَنَا وِالكِلمَة لِي ضِلِّي
وِبَسكَر بيها و بصلِّي
واقُول فِيهَا وِاعِيِد فِيهَا
وِلَمَّا أَسْكُت أَقُول: قَالِّي
وِمِلْت كتِير عَليهَا أَشكِي
حُرُوف عَاصيه وأَنَا تايب
حُرُوف تِنقِل كَلَام عَنِّي
أَكُون مَوجُود وانَا غَايِبْ!!
واشُوف فيها كلام منِّي
كَلَام المَعْنَى فيه دَايِبْ
أَنَا المَخْلُوق بِنُون وَرَا كَاف
أَنَا المَوجُود عَلَى سْطُورِي
أَنَا القَايِل.. سَاعَات لَم شَاف!!
بَشُوف الدُّنيا بِشْعُورِي
أَنَا الكِلمَة الِّلِي مَكتُوبَة
عَشَان أَرضِي بِيهَا غْروري
وانَا الكِلمَة الِّلِي مشطوبة
عَشَان مَا أَكسَرشِي فِي جسُورِي
وانَا الأعمى كما طوبة
وِبيهَا بشوف طاقات نُوري.